HAMETIN FIAR HASORU TENTASAUN : Refleksaun Dominggo I, tempo Quaresma

            Iha moris loron-loron, ema sempre hasoru naran tentasaun. Wainhira hasoru tentasaun, sei akontense buat rua, ida, ita tuir no rua ita la tuir. Dalan tuir no la tuir hanesan sempre akompanha ita nia moris. Wainhira ita la tuir, ita sei lao tuir dalan los. Wainhira ita tuir ita mos monu ba dalan sala. Atu hasoru buat sira nee, ita tengki halo kalkulasaun, buat nee diak ga ou ladiak. Ita nia konsensia mak sei determina dalan moris ita nian. Maibe hanesan pessoa, ita, iha ita sempre hakarak buka buat neebe diak, la iha ema hakarak buka buat neebe aat iha nia moris. Tamba Nai Maromak  kria buat hotu iha mundu nee ho diak. Perguntas; tamba saida ita hili dalan sala? Tamba saida ita monu ba sala?

Loron nee, Evanglho koalia kona ba oinsa Jesus hasoru tentasaun. Tentasaun neebe mosu liu hosi babeur diabo nian. Jesus haderaan iha rai fuik  iha loron 40 nia laran. Iha neeba Jesus hetan babeur hosi diabo sira.

1.  Babeur preimeru: halo fatuk sai ai han. Fatuk sai ai han simbolu rikusoin no gostu mundu nian.

2. Babeur Segundu: hamonu an hosi rai naruk atu haree anjo sira mai ajuda ga lae, simbolu  prestasaun nian.

3. Babeur Terseiru: buat hotu fo ba Jesus, maibe nia tengki adora diabo, simbolu fo posisisaun maibe tengki  adora diabo sira.

Maibe maun alin sira, maske diabo tenta Jesus ho buat furak sira nee, Nia lakoi tuir diabo nee. Nia hatene Aman Maromak mak halo planu salvasaun ona ba Nia. Jesus hakarak tuir dalan los, dalan iha nebe Nia hili rasik no Nia mos hatudu ba escolante no ema sira nebe fiar ba Nia

Refleksaun

            Maun alin sira, loron-loron diabo tenta ita ho babeur sira. Diabo nia babeur ho dalan neebe furak. Nia babeur ita ho buat nebe furak, halo ita mos manu ba lansu neebe nia prepara ona. Buat furak nebe sempre halo ita monu dala barak liu hosi ema sira nebe besik ho ita, ou promote  buat furak nebe ita presija iha ita nia moris loron-loron. Sei mak la presija hahan? Sei mak la hakarak sai ema riku? Sei mak la hakarak ita ema seluk hahi ita? Sei mak la hakarak hetan posisaun neebe diak?  Buat furak sira nebe mai nee, ita bele hetan maibe importante mak ita hetan tuir dalan los nian.

            Maun alin sira, loron  nee Jesus konvida atu tuir Nia dalan, atu ita labele monu ba diabo sira nia babeur. Jesus hakarak atu ita nia matan keta monu lalais ba babeur mundu nian nebe diabo sira lori. Jesus mos hakarak atu ita hotu tuir dalan los nian wainhira ita hakarak buat sira nee hotu.           

            Maun alin sira, dala barak ita monu ona ba sala. Maibe tempo quaresma nee, tempo atu ita mos hadia an, neneik tama iha ita laran atu halo refleksaun. Ita Ida-idak hatene ita monu iha neebe. Lalikan tauk no moe atu fila ba dalan los nia. Maromak sempre simu ita. Dala ruma ita halo sala ba ita familia rasik ou sala hasoru ita nia maluk sira seluk, husu desculpa ba. Wainhira ita nia maluk sira halo sala hasoru ita, fo perdao ba no simu malu hanesan ema sala nain. Mai ba iha tempo quaresma nee, ita ida-ida loke pagina foun iha ita nia moris, atu ita mos sai ema foun, espirtu foun hanesan serani katolika no Maromak Nia oan. Keta tauk, tamba Maromak liman sei nakloke atu simu ita.